அஜீத் ரசிகர்களை குழப்பிய வாட்ஸ் அப்! சிம்புவின் வேலையாக இருக்குமோ என குழப்பம்?

கடந்த இரண்டு நாட்களாகவே மாவட்ட தலைநகரங்களில் இயங்கி வரும் (சைலன்ட்டாக) அஜீத் ரசிகர் மன்ற உறுப்பினர்களுக்கு ஒரு வாட்ஸ் அப் தகவல் வருகிறது. அதையும் அவர்கள் கண்ணும் கருத்துமாக ஷேர் செய்து வருகிறார்கள். இந்த வேகம் நீடித்தால், வாலு படம் திரைக்கு வரும்போது அநேகமாக அஜீத் ரசிகர்கள் அத்தனை பேர் பார்வைக்கும் அது சென்று சேர்த்திருக்கும். அதில் சொல்லப்பட்டிருக்கும் தகவல் என்ன?

தல ரசிகர்களுக்கு ஒரு வேண்டுகோள்….

நடிகர் சிம்பு தல யின் தீவிர ரசிகர் என்பது அனைவருக்கும் தெரிந்த ஒன்று. மன்மதன் படத்தில் ஒரு காட்சியில் “அல்டிமேட் ஸ்டார் அஜித் வாழ்க” என்று கோஷமிடுவார்…. அன்றிலிருந்து சந்தர்ப்பம் கிடைக்கும் போதெல்லாம் தான் ஒரு தல ரசிகர் என்பதை வெளிகாட்டியே வருகிறார்… இனிமே இப்படித்தான் படத்தின் ஆடியோ வெளியீட்டு விழாவில் கூட சிம்புவின் பேச்சை கவனித்தவர்களுக்கு தெரியும். சமீபத்தில் சிம்புவின் புதிய படமான கான் படத்தின் ஃபர்ஸ்ட் லுக் வெளியானது. ஃபர்ஸ்ட் லுக் வெளியான சில நிமிடங்களிலே அது twitter ல் இந்திய அளவில் முதலிடத்தையும், உலக அளவில் 5வது இடத்தையும் பிடித்து ட்ரெண்ட் ஆனது. இதற்கு முழுமுதற் காரணம் தல ரசிகர்களே என ஊடகங்கள் சிலாகித்தன…

இன்று சிம்பு விற்கு இக்கட்டான சூழ்நிலை… 3 வருடங்களுக்கு பிறகு சிம்பு நடித்த வாலு திரைப்படம் ஜூலை 17 அன்று வெளியாகிறது. அதே நாளில் தனுஷ் நடித்த படமும், சிவகார்த்திகேயன் நடித்த படமும் வெளியாகிறது. oneindia இணையதளத்தில் தனுஷ்-சிவகார்திகேயன்-சிம்பு என்ற வரிசை நிலையே தற்போது நிலவுவதாகவும், இந்த இருவரின் படங்களுடன் சிம்புவின் படமும் தாக்குப்பிடிக்குமா எனவும், தற்போது மார்கெட் இல்லாத சிம்புவின் எதிர்காலம் இப்படத்தின் வெற்றியில்தான் இருக்கிறது எனவும், மீண்டும் சிம்பு-தனுஷ் என்று வரிசை மாறுமா? எனவும் செய்திகளை வெளியிட்டு உள்ளது. ஒவ்வொரு தல ரசிகனும் வாலு படத்திற்கு ஆதரவு தர வேண்டும்…

முன்பு ஒரு இக்கட்டான சூழ்நிலையில் தல யின் அசல் படத்திற்கு ரஜினி ரசிகர்கள் வெளிப்படையான ஆதரவு அளித்து, கிட்டத்தட்ட படம் வெளியான அனைத்து தியேட்டர்களிலும் கட்அவுட் வைத்தனர் என்பதை நினைவில் வைக்கவும். அசல் வெளியான சமயம் Facebook,Whatsapp,Twitter இல்லாத காலகட்டம். அதனால்தான் தல யின் வெறித்தனமான ரசிகரான சிம்பு வின் வாலு படத்திற்கு அனைத்து தல ரசிகர்களும் படத்தை தியேட்டரில் சென்று பார்க்க வேண்டும்…

“தல யை நம்பினோர் கைவிடப்படார்” என்ற புதிய வரலாற்றை படைக்க சபதம் எடு தல ரசிகனே…. தல-தளபதிக்கு பிறகு தமிழ் சினிமாவின் மாஸ் ஓப்பனிங் தல யின் வெறியர் சிம்பு வாகத்தான் இருக்க வேண்டும் என்று சபதம் எடு தல ரசிகனே…. தல ரசிகர்களே…. நம் வலிமையை, நம் நன்றியுணர்வை நிரூபிக்க வேண்டிய தருணம் இது…. Facebook,Whatsapp,Twitter என அனைத்து சமூக வலைத்தளங்களில் இதனை பகிருங்கள்…. ஒவ்வொரு தல ரசிகனும் சிம்புவை ரசிப்பான்….. ஒவ்வொரு சிம்பு ரசிகனும் தல-யை வணங்குவான்….

இவ்வாறு பரப்பப்படும் தகவல்கள் நிஜமாகவே அஜீத் ரசிகர் உருவாக்கியதுதானா? என்ற சந்தேகமும் எழுந்திருக்கிறது. ஓவரா நெஞ்ச நக்கும்போதே, இது உண்மையாக இருக்க வாய்ப்பில்லை என்று தோன்றுதே?